28 Ліпеня 2000
Дзень Незалежнасьці сьвяткаваўся і ў Баранавічах
У Баранавічах сёньня меўся адбыцца пікет да Дня Незалежнасьці, аднак гарадзкія ўлады не далі дазволу мясцовай арганізацыі БНФ “Адраджэньне” на яго правядзеньне. Але ініцыятары акцыі вырашылі выйсьці на замоўленае месца ў замоўлены час.
Каля двух дзесяткаў чалавек сабраліся а 17-й гадзіне ў баранавіцкім гарадзкім парку культуры і адпачынку. Без плякатаў і сьцягоў – людз проста прыйшлі адпачываць. Гучала гітара, ліліся беларускія песьні.
Некалькі маладых хлапцоў усё ж спрабавалі пасярод парку на флагштоку вывесіць бел-чырвона-белы сьцяг. Аднак тут жа зьявіліся трое АМАПаўцаў і назіралі з боку за акцыяй, пакуль людзі ціха і спакойна не разыйшліся.
Алесь Горбач, Баранавічы, "Радыё Свабода"
http://brestonline.com/be/news/news172.html