31 Ліпеня 2002
БЕРАСЬЦЕЙСКІЯ ПРАДПРЫМАЛЬНІКІ ПАДТРЫМАЛІ СТРАЙК
Большасьць прадпрымальнiкаў Берасьця, што гандлююць на рэчавых рынках гораду, сёньня падтрымалi агульнанацыянальны страйк сваiх калегаў.
У Берасьцi ня быў створаны адмысловы страйкавы камiтэт прадпрымальнiкаў, але гандляры найбуйнейшых рэчавых рынкаў гораду праявiлi салiдарнасьць у справе правядзеньня папераджальнай акцыi пратэсту.
Да агульных патрабаваньняў, якiя вылучаныя прадпрымальнiкамi Беларусi i скiраваныя супраць плянаваных зьменаў у дэкрэт Лукашэнкi №12, берасьцейскiя гандляры высунулi свае. Яны тычацца адмены некаторых рашэньняў гарадзкiх уладаў, паводле якiх павялiчаныя cтаўкi мясцовых збораў з прадпрымальнiкаў.
Гандляры берасьцейскага цэнтральнага рынку таксама патрабуюць ад адмiнiстрацыi стварэньня роўных умоваў працы разам з гандлёвымi кропкамi аблспажыўсаюзу, да якога належыць рынак.
http://brestonline.com/be/news/news1532.html