30 Ліпеня 2001
Беларускі крымінал на расійскіх «фальшыўках»

 Істотна паменшыць колькасць патрыманых іншамарак у Брэсце ўдалося групе сваіх і «залётных» махляроў. Адсочваючы па газетных аб’явах прапановы па продажу аўтамабіляў ад 8 гадоў і старэй, купцы прапаноўвалі найбольш зручныя ўмовы. Пры сустрэчы яны перадавалі ўладальніку легкавіка немалую для яго суму валюты ў заклад, а самі ад’язджалі нібыта праверыць аўто на хуткасць. Пакупнікі не вярталіся, а гаспадар не кідаўся ў вышук, бо «баксы» ад іх хоць і былі фальшывымі, але настолькі высокай якасці, што некаторыя і па сённяшні дзень не падазраюць, як іх нахабна абдурылі.
І ўсё-такі пасля шэрагу заяваў міліцыі ўдалося затрымаць жыхароў Слуцка, Салігорска і Брэста, у якіх на руках былі буйныя сумы 100-доларавых і расійскіх купюраў па 500 рублёў. Але на месцы нават дасведчаныя «валютчыкі» не здолелі распазнаць «ліпу». Між тым падследныя зараз прызнаюцца, што выконвалі чужыя загады са Стаўрапольскага краю. Аўтамашыны даверлівых беларусаў пераганяліся ў Расію на перапродаж за сапраўдныя грошы.