31 Траўня 2001
Інвестыцыі для брэсцкага «катла»

 На міжнародным беларуска-польска-дацкім семінары пад назовам «Зніжэнне экалагічнай пагрозы, выкліканай назапашваннямі глеевага асадку на брэсцкіх ачышчальных збудаваннях» прынятае рашэнне аб пачатку фінансавання сумеснага праекта.
Праграма першачарговага інвесціравання прадугледжвае пастаўку абсталявання па абязводжванні асадку, яго ўшчыльненні, а таксама рамонт і аднаўленне так званых лагунаў, куды на працягу сутак горад скідвае 350 тонаў бруднай паўвадкай масы з прадпрыемстваў, жылля і вуліцаў. Дацкае Агенцтва абароны навакольнага асяроддзя (DEPA) прадастаўляе для гэтых мэтаў ураду Беларусі грант у 2,2 мільёна еўра. Памеры наступнага фінансавання наўпрост залежаць ад выканання пісьмовых дамоўленасцяў па выпраўленні арганізацыйных, структурных і кантрольных функцыяў у дзейнасці ачышчальных збудаванняў, якія апынуліся зараз на мяжы экалагічнай катастрофы.
Увогуле, міжнародны праект разлічаны на 20-гадовы тэрмін з агульным аб’ёмам заходніх інвестыцыяў 9,7 мільёна еўра (45% ад агульных укладанняў). Другую частку фарміруюць мясцовыя фонды, польская крыніца і донарская праграма TACIS Еўрасаюза. Па велічыні каштарысных затратаў не цяжка ўявіць, якога маштабу праблемы існуюць зараз на адкрытых рэзервуарах у непасрэднай блізкасці ад мяжы, на правым беразе Буга з ягонай імклівай плынню ў бок Варшавы. У «азёрах» з памыямі зараз 250 тысяч кубаметраў густога асадку. ("Галіна БАРАВАЯ, Наша Свабода")