29 Сакавіка 2001
Пракаповіча вартаваў АМАП

 26 сакавіка ў Брэсце адбыўся сход ініцыятыўнай групы падманутых укладчыкаў гарадскога філіяла банка «БелБалтыя», а ранкам 28 сакавіка больш як 150 чалавек сабраліся на плошчы перад будынкам аблвыканкама, каб патрапіць да старшыні Нацбанка Пятра Пракаповіча. Банкір у гэты дзень абяцаў весці прыём грамадзянаў па асабістых заявах і скаргах. У спісе папярэдняга запісу было да 60 прозвішчаў.
Натоўп на плошчы змяніў планы: выкліканы атрад АМАПа ў аўтобусе з зачыненымі вокнамі толькі разгнявіў людзей сталага веку, і яны групай рушылі да ўваходных дзвярэй «белага дома» ўлады. Міліцыянтам з аховы аддалі загад суправаджаць гэтых наведвальнікаў у залу паўпадвальнага памяшкання, куды неўзабаве спусціўся і сам Пракаповіч. На працягу амаль трох гадзінаў не спыняўся непрымірымы дыялог, адзіным станоўчым вынікам якога можна хіба лічыць, што 68-гадовая хворая пенсіянерка атрымае ўсё-такі частку сваіх валютных зберажэнняў у «БелБалтыі» на платную аперацыю ў лякарні. Астатнім было паўторана, што спадзявацца на які-небудзь зрух у справах 3.000 брэсцкіх кліентаў камерцыйнага банка не варта да жніўня. І хаця стомленыя на фармальнай сустрэчы людзі вяла разыходзіліся ад цэнтра горада, аднак АМАП у аўтобусе цікаваў за імі да апошняга. (Галіна БАРАВАЯ, "НАША СВАБОДА")