27 Жніўня 2001
Уладзiмер Ганчарык у Берасьці

 Уладзiмер Ганчарык апошнiя тры днi знаходзiўся ў Берасьцейскай вобласьцi. Ягоныя сустрэчы з выбаршчыкамi ў абласным цэнтры адбывалiся ў перапоўненых залях. Мясцовыя ўлады не дазволiлi адзiнаму кандыдату на прэзыдэнта ад шырокай грамадзянскай каалiцыi ладзiць такiя сустрэчы на адкрытых пляцоўках.
Позна ўвечары 24 жнiўня ў будынку абласнога аб'яднаньня прафсаюзаў скончылася першая сустрэча Ўладзiмера Ганчарыка з выбаршчыкамi Берасьця. Малая частка тых, хто прыйшоў паслухаць выступ кандыдата на пасаду прэзыдэнта Беларусi, здолелi трапiць у залю: месцы ў ёй былi занятыя яшчэ да прыезду спадара Ганчарыка.
Падобная сытуацыя склалася i сёньня, калi сустрэча з выбаршчыкамi ладзiлася ў абласным Палацы культуры прафсаюзаў. Актывiсты мясцовага штабу Ўладзiмера Ганчарыка кажуць, што прадбачылi такую цiкавасьць да гэтых мерапрыемстваў i зьвярталiся да берасьцейскiх уладаў з прапановай правесьцi сустрэчы на адкрытых пляцоўках – напрыклад, на стадыёнах. Але адказныя чыноўнiкi "вэртыкалi" заявiлi, што па дазвол на правядзеньне масавых акцыяў трэба зьвяртацца ва ўстаноўлены тэрмiн – за 15 дзён да правядзеньня мерапрыемства. Зразумела, што заплянаваць гэты візыт Ўладзiмера Ганчарыка ў Берасьце яшчэ да моманту яго рэгiстрацыi ў якасьцi кандыдата на прэзыдэнты было немагчыма.
Падчас сустрэчаў спадар Ганчарык адказваў на шматлiкiя пытаньнi выбаршчыкаў, што тычылiся самых разнастайных тэмаў – ад узаемадносiн з палiтычнымi партыямi i стаўленьня да прыватнага сэктару эканомiкi да асабiстых захапленьняў i адносiнаў да рэлiгii. Уладзiмер Ганчарык некалькi разоў зьвяртаўся да тэмы зьнiкненьня вядомых на Беларусi людзей. Мяркуючы па рэакцыi выбаршчыкаў, што прыходзiлi на сустрэчы з кандыдатам на прэзыдэнта, шмат хто зь iх ня вядаў пра iснаваньне дакумэнтаў на гэты конт, якiя былi агучаныя Ганчарыкам. Ён таксама запэўнiў, што ў блiжэйшы час зьявяцца новыя сьведчаньнi ў справе зьнiклых палiтыкаў: яны будуць агучаныя па расейскiм тэлебачаньнi.
Спадар Ганчарык i яго давераныя асобы заклiкалi берасьцейцаў прыйсцi на выбарчыя ўчасткi менавiта 9 верасьня, каб пазбавiць цяперашнi рэжым магчымасьцяў для масавай фальсыфiкацыi вынiкаў галасаваньня. Аб сваiх ўражаньнях ад сустрэчаў на Берасьцейшчыне Ўладзiмер Ганчарык распавёў Радыё Свабода:
(Ганчарык: ) "У мяне самыя добрыя ўражаньнi ад сустрэчаў, што прайшлi. Галоўнае, што мяне задавальняе – вельмi вялiкi iнтарэс да ўсяго, што адбываецца на Беларусi. Я раблю выснову, што прапаганда, якую вядзе Лукашэнка, прымушае людзей задумацца – што адбываецца з гэтай хлусьнёй i падманам. Я думаю, што ўсё больш людзей будзе галасаваць супраць такой палiтыкi i сыстэмы, якая, на жаль, склалася ў нашым грамадзтве i дзяржаве".
Сёньня Ўладзiмер Ганчарык таксама наведаў Баранавiчы, дзе адбылася сустрэча зь мясцовымi выбаршчыкамi.