26 Жніўня 2001
Узбекскага хлопчыка ў РБ не хочуць лячыць бясплатна

 Суд Мінскага раёна не задаволіў скаргу сям’і Ганбярдзіевых на адмову ўрачоў Рэспубліканскага навукова-практычнага цэнтра дзіцячай анкалогіі і гематалогіі лячыць іх сына.
Сям’я узбекаў Ганбярдзіевых жыве ў Брэсце без прапіскі. Нядаўна ў іх захварэў двухгадовы сын. Па дапамогу бацькі звярнуліся ў рэспубліканскі цэнтр дзіцячай анкалогіі, паколькі ў дзіцяці выяўлена «злаякасная пухліна». У цэнтры дзіцяці правялі адзін сеанс хіміятэрапіі, але далей лячыць бясплатна адмовіліся, паколькі хлопчык не з’яўляецца грамадзянінам Беларусі. Вярнуўшыся ў Брэст, бацькі звярнуліся па дапамогу ў брэсцкую абласную бальніцу, дзе дзіця некаторы час праходзіла сімптаматычнае лячэнне. Аднак, як сцвярджаюць урачы, яму неабходна лячэнне менавіта ў рэспубліканскім цэнтры.
Пасля таго, як суд не задаволіў скаргу бацькоў, узбекскі хлопчык фактычна застаўся без дапамогі. Бацькі маюць намер адкрыць спецыяльны рахунак, паколькі ў Брэсце знайшлося шмат людзей, гатовых аказаць сям’і фінансавую дапамогу. Для лячэння неабходна сабраць каля 15 тысяч долараў ЗША.